الشارع المغاربي: سي عمر الشتوي نائب وقيادي سابق في حزب المؤتمر من أجل الجمهورية تعْرَفْ كتونسي أصيل وحر حتى من مظهره ولباسه، يتنفس تونسي حتى النخاع… تْقابِلْ توّا مدة في بلاتو تلفزي مع خوه محسن حسن… هاك الّي أسّس مع سليم الرياحي الحزب الوطني الحر ومن بعد خرج من الحزب وقال في خوه سليم الباهي والدوني ومن بعد رجع صحاب مع خوه سليم ومن بعد خرج على خوه سليم ومشى لخوه حافظ قائد السبسي في حزب النداء… وسمّع عمر الشتوي خوه محسن حسن برشة كلام… أيا سيدي هاو اش قالو : “يالّي تعمل في البراكاجات للمستثمرين، جماعتك هازين الدقلة والزيت للاتحاد الاوروبي… كل بطحة عندك فيها علالش للناخبين… حاسب روحو سياسي…” الحاصيلو لا خلّا فيه ولا بقّى… محسن حسن ما سكتش طبعا وقعد يقول ويعاود : “مالاّ مستوى، توّا هذا مستوى متاع سياسي… والله عيب…” وردّ عليه خوه عمر وقالو: “عيب واحد كي سيادك“… وفي نهاية الامر تلزّ بوبكر بن عكاشة باش يسكّر البرنامج.

ايه واش عملنا في العلالش ؟ على خاطر محسن حسن ما نكرش، ما قالش موش صحيح وغالط.. يا خويا اذا كان كيف ما قال عمر الشتوي في كل بطحة محسن حسن عندو علالش يفرّق فيها على الناخبين وكل علوش بهاك الحسبة مالاّ يلزم معاه شكارة ولا 2 فلوس… وزعمة منين جابهم ؟

الحاصيلو اذا غابت عليك حويجة قول فهمت…