الشارع المغاربي – سي الموخّر يعرف الناموس...L'agora

سي الموخّر يعرف الناموس…L’agora

13 يونيو، 2018

الشارع المغاربي: ياخي كنّا نعرفو أحنا الّي ثمّة ناموس ريفي وناموس بلدي ؟ الحقيقة لا ! مالاّ أهوكا الوزير الّي لاهي بالناموس، سي الموخّر، فسّرلنا المسألةقالك ثمّة ناموس ريفي، ربما مخشنب، ويسكن ربما في البشاشمة وزعفرانة وبرنوصة وبورويس وثمة ناموس بلدي ربما فينو يسكن في المرسى وفي قمرت وفي حي النصر والمنار

الناموس البلدي يسايسو عليه، يحطّو محابس الحبق ويحرقو أوراق الرند باش يبعّدوه والناموس الريفي يجيبولو هيليكوبتير معبّي بالفليتوكس ويرشّوه بلا شفقة ولا رحمة

ربما الناموس البلدي قرصتو ما توجعش برشة أما يدكّكْ والناموس الريفي يفدّد ويخرّج من العقل، المهم التوانسة الكل مقروصين ومشويين باستثناء طبعا سي رياض الموخّر وزير متاع الناموس هاذاكا يجيه نوع خاص من الناموس لا ريفي ولا بلدي، spécialيحطّ بحذاه قبل ما يرقد كاس وسكي (في الافطار) يمشيلو الناموس دغري وياخذ غرضو ويتْكّى ويا من عاش لغدوة

وربي يفضّل سي الموخّر قاهر الناموس


اقرأ أيضا

الشارع المغاربي


اشترك في نشرتنا الإخبارية



© 2020 الشارع المغاربي. كل الحقوق محفوظة. بدعم من B&B ADVERTISING