الشارع المغاربي – L’AGORA : محاسبة...

L’AGORA : محاسبة…

11 أكتوبر، 2018

الشارع المغاربي : سي رياض الموخّر، وزير البيئة وحويجة أخرى، موافق على الكلمة القنبلة الّي قالها عبد الكريم الزبيدي وزير الدفاع ورجّ بها البلاد والعباد… قال سي عبد الكريم للسياسيين : “يجي نهار والشعب يحاسبكم”.

الراجل هذا سي عبد الكريم جا للسياسة من باب الصدفة وعمرو ولاّ كان ناشط حزبي بالفمّ والملا… أصلو طبيب وعميد كلية الطب والظروف حبّتو يدخل السياسة، والحقيقة وين حلّ فْلَحْ، كان مثلا ينجّم ياخذ الحكم بسهولة وقت الّي كان الحكم ملوّح لكن تشبّعو بثقافة الدولة المدنية -هو بورقيبي العقيدة- ما خلاهّوش يعمل ها العملة… نجيو توّا لسي رياض الموخّر وزير البيئة وحويجة أخرى، سألوه في تلفزة من التلفزات على كلمة سي عبد الكريم ياخي قال بكلّ وضوح وأريحية : “موافق على الكلام الّي قالو سي عبد الكريم” معناها موافق الّ باش يجي نهار والسياسيين يتحاسبو تقولش عليه موش منهم… ولسان حالو يقول : “أنا سياسي لا محالة أما سياسي من الباهين موش مالجماعة الّي باش يتحاسبو”… سيادتو في مأمن من المحاسبة… ايه، واش عملنا في هاك الكذبة الّي شدّتك بها سامية عبو بالكمشة في البرلمان قدّام الشعب التونسي ؟ وبالمناسبة بالله وين وصلت النازلة الّي تقدّمت ضدك في ها الموضوع ؟ تردمت ؟ تسكّر عليها القجر ؟ على كلّ حال سي عبد الكريم ما حكاشي على محاسبة القضاء أما على محاسبة الشعب..
والشعب في هال 8 سنين عرف بالباهي شكون الصالح وشكون الطالح وشكون الصادق وشكون الكذّاب وسي الموخّر الناس الكل تعرف الّي عمرو ولا يكذب…


اقرأ أيضا

الشارع المغاربي


اشترك في نشرتنا الإخبارية



© 2020 الشارع المغاربي. كل الحقوق محفوظة. بدعم من B&B ADVERTISING