الشارع المغاربي – L'AGORA: وزير التجهيز والكركم

L’AGORA: وزير التجهيز والكركم

28 ديسمبر، 2018

 الشارع المغاربي : ثمة وزير جديد اسمو سي نور الدين السالمي لاهي بوزارة التجهيز متاع القناطر والكيّاسات والبراجات… عمل تصريح ملفت للنظر موش في ما يخصّ القناطر والكيّاسات أما في ما يخصّ الحليب والزبدة والطماطم والمعدنوس والكركم قالك سي نور الدين السالمي الّي أسعار المواد هاذي
وزادة سعر اللحم في متناول الجميع…
ايه نعم سيدي، والله قالها، ايه نعم وزير متاع حكومة الشاهد قال الكلام هذا قال الّي الاسعار هذي في متناول الجميع… والله قالها… أيّا سيدي تعرفشي كيفاش زايد الكلام… نعملو مع سي نور الدين السالمي تجربة صغيّرة… نعطيوه 20 دينار ونقولولو أهبط للمرشي وشوف هال 20 دينار اش باش يجيبولك…
كان ناوي تركّب افيّم مقرونة بشوية زهومة فطور وعشاء تنجّم تسلّكها أما الغلة والياغورت والحليب والله لا تراهم… وكان تحبّ تشري شويّة غلّة يلزمك وقتها تعمل مقرونة كذّابة، بلاش لحم!
هذا بالنسبة للّي ينجّم يسخّر 20 د في النهار للماكلة… معناها يلزم المدخول متاعو يكون أكثر من 1000 د… توّا تجربة أخرى يهزّ معاه 10 دينارات بركة واذا تنجّم تركّب بيهم شكشوكة بالعظم لاربعة من الناس بوك راهو باي… أيا برّة سي نور الدين يا وزير التجهيز ربّي يجبرلك ويصلح رايك ويبقّي عليك الستر…


اقرأ أيضا

الشارع المغاربي


اشترك في نشرتنا الإخبارية



© 2020 الشارع المغاربي. كل الحقوق محفوظة. بدعم من B&B ADVERTISING