الشارع المغاربي : هاوكا سي سمري الطيب قاعد يخمّم ويركز ويقيس ويغيس قبل ما ياخو قرارو في ما يخص انضمامو لحزب يوسف الشاهد…
مسألة عظيمة الحق!!! على خاطر سي سمير الطيب موش الي يجي، شخصية عظيمة والقرار الي باش ياخذو ما ينجم يكون زادة كان عظيم… عندو الحق اذّ باش يركز ويزيد يركز… يا أخي حزب الشاهد فيه سمير الطيب موش كيما حزب الشاهد ما فيهش سمير الطيب، الفرق عظيم يا أخي…
اذن ما ثمة حتى مانع لانضمامو لحزب الشاهد، حزب المسار الي كان الامين العام متاعو ماو هز منّو يديه وقال الي سمير ما عادش يمثلوّ وسماو جنيدي عبد الجواد امين عام جديد… أما مسألة المبادئ والقناعات هذيكا حكايا متاع دغف الي ما يفهمو شيء في السياسة… ياخي سمير موش وصل قال الي راشد الغنوشي وراء اغتيال الشهيدين؟ هاوكا توا في صحفة العسل معاه ومتحالف معاه في السراء والضراء! لا ما ثمة حتى مانع.
ونزيدك زيادة سي سمير ولات عندو توّا تجربة حكومية لباس بيها… على رأس وزارة الفلاحة باش يخلي أقوال مأثورة راسخة في الذاكرة الوطنية من جملتها تأكيدو الي مايتنساش كيف قال التوانسة عمرهم ولا تربّاو على ماكلة زيت الزيتونة.
خلاصة القول عندو ألف حق باش يخمم ويرّكز وعندو زادة الحق باش يفكر في بيع الانضمام متاعو بأغلى الأسوام: مثال وزير سيادي في دولة يوسف الشاهد، وزير العدل ولاّ وزير الدفاع…علاش لا ياخي الّي توا في المناصب هذه خير منّو؟… أبدا، وسمير يزيد عليهم بحاجة نادرة وعزيزة: سمير ضامر ويضحك ويقتل بالضحك… آخر فدلكة وضمار متاعو تصريحو فيما يخص صيد الغزال والحبارة من قبل الخليجيين، قالك لا ثمة غزال ولا حبارة في الصحراء!!! معناها الناس الكل تكذب الاّ هو! يا خويا ضامر وغلبنا بالضمار وربي يبقّي عليه الستر.
