الشارع المغاربي – L'AGORA :ابشرو يا توانسة... ولّى عندنا مركز متاع حلاقة وتجميل الحيوانات !

L’AGORA :ابشرو يا توانسة… ولّى عندنا مركز متاع حلاقة وتجميل الحيوانات !

22 مارس، 2019

الشارع المغاربي -إغداد بية المالحة : أيّا سيدي ابشرو… ابشرو يا توانسة… ولّى عندنا مركز متاع حلاقة وتجميل الحيوانات : الكلاب والقطاطس والقرودة والحنوشة و….يا خويا قالو الحيوانات الكلّ على بعضو…

في حفل التدشين جات الحضّارات الزغراطات وجوّ يعمل الكيف واش من شيء يوقّف المخّ تعْرِضْ : يا قلّمات حمّير، يا مقصّات ظوافر، يا خلالص متاع شعر، يا شيِتْ متاع حكّان سنّين، ثمّة شيِتْ متاع كلاب وشيِتْ متاع قطاطس وشيِتْ متاع جرابع… شيء كبير وثمّة بارتي متاع الحوايج : سراول متاع فرززّو وروبات متاع نحل وكساوي تعمل الكيف متاع النمّال…

والكلّ مستورد نزيدك زيادة… على خاطر أحنا في تونس ما عندناش ها الفيانة الكلّ.. أكثر ما نجّمو نعطيوه للقطاطس، بصفة عامة وبدون تعميم، قزادر متاع زبلة يغطّسو فيها روسهم ثمّاش ما يستقاتو حويجة… صحيح عندنا قفصّات متاع سيدي بوسعيد ويبدى فيها كويّس متاع ماء وصحيفة صغيرة متاع زيوان، وهزّ يدك…

حاجة بركة الحق تقلّق، ما كارهمش لُخيّات عملو مركز في تونس العاصمة، أما مثلا في بير الحفي ولاّ في البشاشمة تجي أضمر…خلّي التوانسة أينما كانو يفرحو ويستبشرو، الّي عندو والّي ما عندوش ينجّم يجيب كلبو ولاّ قطّوستو ولا وزغتو ولاّ جرادتو يحمّرولهم ويغبّرولهم ويزيّنولهم… ولا تحرم يا ربّي التوانسة من فرحة بجاه سيدي بوعكّازين…

صدر بالعدد الأخير من أسبوعية “الشارع المغاربي”.

 


اقرأ أيضا

الشارع المغاربي


اشترك في نشرتنا الإخبارية



© 2020 الشارع المغاربي. كل الحقوق محفوظة. بدعم من B&B ADVERTISING