التنبير الانتخابي: المترشحين للرئاسة سيدي خويا ثلاثة أنواع
قسم الأخبار
5 سبتمبر، 2019
0share
الشارع المغاربي-منير الفلاح: المترشحين للرئاسة سيدي خويا ثلاثة أنواع ..النوع الأول يقول تونس مريقْلة وامورنا باهية وعايشين كأننا في سويسرا وعملنا برشة انجازات، المترشحين هاذم هوما الي قاعدين يحكموا توّة، عزيزي المواطن اذا انت حاسس روحك عايش في سويسرا تنجم تصوتلهم وضميرك مرتاح خلي يواصلو انجازاتهم .
النوع الثاني يقول تونس كانت مريقْلة وامورنا باهية وعايشين كأننا في سويسرا وعملنا برشة انجازات لكن كيف خرجوا من الحكم رجعت تونس في حالة مزمرة ورجعت البطالة والفقر والعنف، المترشحين هاذم هوما الي حكموا أو شاركوا في الحكم قبل اذا انت حاسس انو وقت الترويكا ووقت التكنوقراط ووقت بن علي كنا عايشين في سويسرا تنجّم تصوتلهم وضميرك مرتاح خلي يعاودولنا انجازاتهم .
النوع الثالث هوما اللي يقولو تونس ما عمرها ما كانت مريقْلة وامورنا ما عمرها ما كانت باهية ومانحبوش نبقاو كيما توّة ولا كيما وقت التكنوقراط ولا كيما وقت الترويكا ولا كيما وقت بن علي، وأنو تونس باش تولي مريقْلة يلزمها تتبنا على اسس صحيحة وجديدة لازم خيراتها وثرواتها يبقاو لاولادها وبناتها باش ينجمو يعيشو ويخدمو ويعالجو.. تونس يلزمها حل جديد موش حل جربناه وفشل ..عزيزي المواطن اذا تحب حل جديد موش قديم صوت للّي يحكي هكّة وضميرك مرتاح… انا نصحتك على طريقة سيد أحمد المغيربي وانت دليلك ملك.
