الشارع المغاربي: الحاصيلو بلادنا تونس بلاد العجايب والغرايب : من جهة غارقين الهوني في المصايب وعايشين بالسلف ونهزّو ساق تغرق لُخرى وآخر الأخير ولّينا ناقصين دوايات والّي عندنا ما يكفّيناش أكثر من شهرين والناس بدات تموت في السبيطارات من قلة الدوايات ومن جهة أخرى نهزّو في بطولات عالمية… هاو درة زروق انتخبوها أكثر مرا عربية أناقة وهاو المهندس رضا دمق اخترع حاجة ما ثمّاش في الدنيا والجمعة الّي تعدات هزينا في جربة بطولة عالمية جديدة… تونس جات الاولى في المهرجان العالمي للخبز… ثلاثة أنواع متاع خبز جاو لولانين : خبز الطابونة بالكليل والفاكية وخبز الغرايف بالتمر والسمن والبطبوط بحبة الحلاوة… الله مصلي على النبي…
على كل حال موش ما عندنا كان الهزايم عندنا زادة انتصارات والحمد لله وانتصار في الخبز عندو نكهة خاصة… الخبز هو رمز الحياة يا خويا !
أما خسارة… شطر القمح الّي نعملو به في الخبز موش من ارضنا ! أما من أمريكا…
خسارة حتى كي نفوزو بحويجة تطلع ناقصة… ماكذبش الّي قال «الخبزة مرّة».
