الشارع المغاربي : قالك خالد شوكات، وعلى حسب ما فهمنا ما زال قيادي في حركة نداء تونس (شقّ حافظ طبعا)، قالك يوسف الشاهد “فرّ بالسلطة“… معناها هرب بيها…

تصوّرو السلطة كي “الصَرّ” كيف الّي تهزّو المرا التونسية الزمنية للحمام، ويوسف الشاهد هارب بيه من بلاصة لبلاصة ومن حومة لحومة، مرّة يحطّو على راسو… ومرة يهزّو هزّان… ومرّة تحت ضبّوطو… وسي الباجي خالط في جرّتو هو وولدو حافظ ورضا بالحاج وبرهان بسيّس وخالد شوكات يعيّطو ويصيحو : “يا سارق… يا غدّار… يا غندي… رجّع الصرّ خِيرْلِكْ… والله لو كان ما ترجّعو لما نعملو فيك سبّة“… وتقول يوسف حشم ولاّ جعر ولاّ سمع الكلام ولاّ رجع على ثنيتو؟ يا ولدي باللازمة يبرتع في تبرتيع أزرق، تقول هاربة به فرس… خاصة الّي كيف ما قال خالد شوكات الرجل يعرف “الثغرات الدستورية” الّي يهرب منها… معناها حتى كي يحبّو الجماعة يتعرّضولو في زنقة من الزناقي يعرف كيفاش يفصع بيهم…

الحاصيلو مالاّ شوكات ! يا خويا يعطيه الصحة في ها التشبيه! ما هو صنايعي عاد هو في الهربة! ينجّم يكتب عليها كتب وينظّرلها ويقنّنها ويمأسسها… أما هو ديما يتشدّ… بعظمتو…