الشارع المغاربي: ثمّة فازة قديمة شويّة لا محالة صارت وقت إلّي الجريدة في عطلة… يا خويا ما ينجمّش الواحد يخلّيها تتعدّى هكّاكة كإنّو ما صار شيء… فازا حلوّة برشة وضامرة وكلّها ذكاء وفطنة، شيء كبير…

سي ناجي جلول، يخدم توّا مدير المعهد الاستراتيجي في رئاسة الجمهورية برتبة وزير بشّرنا يبشّرو بالخير… قالك حركة نداء تونس إلّي تحكم في البلاد توّا 4 سنين هذيكا يا سيدي بن سيدي، عندها حلول تخرّج تونس من أزمتها في 6 شهور !!! والله قالها… يا ولدي باللاّزمة قالها… أقسم بالله قالها ومسجّلة في أكثر من موقع… لا لا الراجل ما هبلش، ما ضبّعش، بعقلو… تي الراجل ما زال وزير يصول ويجول في الرئاسة ومحبوب ياسر… والتوانسة يموتو عليه ويفناو… تي باهي أشنيّة الحلول هاذي ؟ لا ما حبّش يقول عليها، مخبّيها في شونو ومستحفظ عليها، وما يحبّ يقول عليها لحتّى حدْ خايف لا يسرقولو أفكارو… توّا هذا كلام ؟ يحرم تونس منها وقت إلّي البلاد تشهق ما تلحق وحالتها تكرب ؟ وين يعرف عليه الواحد ! أما توّا عندو شهر ملّي بشّرنا ولْتوّا ما حبّش يقول عليها الحلول… هيّا نقدّمو بيه نازلة مالاّ… نلمّو بعضنا عشرة مواطنين ومواطنات ومعانا محامي ولاّ زوز ونرفعو دعوى للسيد وكيل الجمهورية… مالاّ هكّاكة… يقول عندو حلول يخرّجو التوانسة من الفقر والجوع ومن البطالة ومن السخط وما يقولش عليها، ياخي يحسبها لعبة الحكاية ؟

أيّا يزّي برّد دمّك يا راجل وتوحّد الله وبدّل ساعة بساعة أخرى وخلّي الأمر يستراح… بالكشي توّا يهديه ربّي ويقول عليهم الحلول… ما تنساش يا صحوبة : إذا كان خصيمك الحاكم لشكون باش تشكي…