الشارع المغاربي : قالتلك سامية عبو في تصريح ل «صبرة اف ام » ما ثمّاش منها حكاية القطيعة بين النهضة والنداء… كلّوخ في كلّوخ… علاش ؟ على خاطر ما ينجّموش يبعدو على بعضهم… مستحيل… ايه وعلاش؟ على خاطر يا سيدك بن سيدك لو كان يتعاركو مع بعضهم الاثنين يدخلو للحبس !!! يا بيْ! حبس جملة.

وحدة ! يا رسول الله !

معناها الباجي والغنوشي ومورو والشاهد ومحرزية وطوبال وفلانة وفلتانة وفلان وفلتان الكلّهم في بوفردة؟
يا سامية أختى ساعد روحك راهو ثمّة ربي! ايه وعلاش يدخلو الكلهم للحبس؟ قالتلك للاّ سامية على خاطر الكلهم شادّين دوسيات وملفات على بعضهم… ولو كان تورّي نورّي كيف ما قالت فلتانة بن فلتانة…
يا بنتي أنا ملفات وأنا دوسيات ؟ صلّ على النبي ! تي ناس أفاضل العالم الكلّ يعرفهم… أنظف من الفرفوري بعد غسيلو وانت تقولي دوسيات؟ عيب ها الكلام… وما يجيش منّو وما يخرجّش علينا ها الريق… توّا سي راشد مثلا عندو دوسيات متاع فساد ؟ ولاّ حافظ ؟ مستحيل ! فلوسهم معروفة حلال محلّلة وكلّها جاية من الاشتراكات والتبرعات متاع مناضلي أحزابهم… وهوما بنفسهم أكّدو على الشيء هذا وحلفو بالايمانات يا بنت الناس…
ارجع لمولاك…
ايه زعمة علاش لا النهضة ولا النداء ما ردّو عليها وما جاوبوهاش ولا استنكرو بشدة مثل هذه التصرفات اللامسؤولة كيف ما تقول اللغة الخشبية؟ الله ورسوله أعلم! تقول انت طفّاو الضو خير ما الفضايح والمحاكم والشوهات؟  يا ولدي الله ورسوله أعلم والسلام.

صدر بأسبوعية الشارع المغاربي في عددها الصادر يوم الثلاثاء 2 سبتمبر 2018.