الشارع المغاربي: أما هذا السفير متاع فرنسا في تونس طلع أش من وحيِّد! عمل كلمة بمناسبة عيد الفطر باللهجة التونسية، قصيّرة وحلوّة وفيها برشة صدق، والصدق ظهر من قسمات وجهو ومن نبرات صوتو ومن الكلمات الّي اختارها. هاو اش قال : “أنا معجب بالذكاء التونسي، الّي باش يجعلكم في المرتبة الاولى في كلّ شيّ… تونس في قلبي (est dans mon cœur) ان شاء الله عيدكم مبروك“.

من جهة أخرى الراجل مقطّع روحو تقطيع باش تونس توقّع على اتفاق التبادل الحر المعمق والشامل في 2019 على أقصى تقدير… والاتفاق متاع الـALECA هذا عبارة على معاهدة باردو جديدة، يعني استعمار جديد… أما ذكي… كي التوانسة !

حويجة أخرى : السيد السفير قالها بالفم والملا الّي هو وسفراء البلدان السبعة الكبيرة متاع العالم ما يحبّوش يوسف الشاهد يتنحّى على خاطر وعدهم باش يصحّح على اتفاق الـ ALECA في 2019 كيما الناصر باي في 1881 !!!

الحاصيلو كل واحد وذكاه : السفير يحب يستعمر تونس من جديد والشاهد يحب يولّي رئيس بالسيف والتوانسة يتبّعو في الخرم الكلّ… أما بذكاء كيف ما قال السفير ولسان حالهم يقول : الّي يحسب وحدو يفضلّو.