الشارع المغاربي: الجماعة دوّروها ماخورات يا سيدي… بداتها الاستاذة سلوى الشرفي، كِتْبِتْ بكل براءة وعفوية خطَيِّطْ على صفحتها على الفايسبوك،  خطَيِّطْ كلّو ضمار قالت فيه الّي شعار نداء تونس الانتخابي “الدار الكبيرة” راهو اسم متاع ماخور كان موجود في باب الجزيرة (La grande maison)… قامت القيامة ولّى موضوع الساعة في البلاد… يا تمقعير. يا تفيسيخ يا جبدان بالمرتاح… نساو التوانسة هموم البلاد وشدّو في أمور الماخورات حتى دخل برهان بسيس في الطرح ورفع مستوى النقاش وفكّر الناس الكل الّي أكبر ماخور في تونس تسمّى على اسم ولي صالح اسمو “سيدي عبد الله قش” !!! يقول القايل ما هو يوفى الحديث هوني وتقصّ النزاع… لا يا سيدي قالك كيفاش كيفاش برهان ينطق بالاسم هذا على الهواء والناس مخلّطة تسمع وهاذاي عيب وقلّة حياء…

الحق الحق ما كاروش برهان يتكلم هكّة، ما يجيش منّو الحق… على الأقل يتبّع المرحوم مزالي… المرحوم ما كانش يقول سيدي عبد الله قش أما سيدي عبد الله القُشَيْش… هكّة أحلى وتتعدّى.