الشارع المغاربي: شكيب الدرويش المعلق في برنامج “كلام الناس” على قناة الحوار التونسي يُعتبر من المثقفين النهضويين الّي عرف كيفاش يفرض أسلوبو على مشاهدي البرنامج… يعرفوه الّي هو نهضاوي في الدم أما بذكاء وبثقافة محترمة وفصاحتو كمحامي نجح في استنباط لغة مقبولة وفي بعض الأحيان سمباتيك Sympathique…

حتى التوانسة الي ما يطيقوش النهضة ولّاو يسمعوه… خلاصة القول نجح في مهمتو… وربما شعورو بنجاحو وقبولو هو الّي خلاّه في الحصة الّي تعدات من البرنامج خرج خرجة ما جاتش لبال حدّ… خلاّت الناس الكلّ افّامهم طاقة… ما كانتش منتظرة بصفة عامة ومنّو هو بصفة خاصة… الراجل عمرنا ولاّ سمعناه قال كليمة يُشتمّ منها غشّة على الطريقة التونسية ولا ايحاءات جنسية ولا كلمة من الحزام اللّوطى… يا خي لا بالك ولا وسّع تحدث بكل جدية واريحية عن بعض أنواع الرقص التونسي الأصيل ومنها شطحة “القبوحي“… ايه قالها شكيب هو بنفسو موش واحد آخر.. قال ثمّة شطحة تونسية اسمها “القبّوحي“… اي سيدي ما زالنا نسمعو ! وقبّوحي هاذيا كلمة جايا من كلمة تونسية أخرى اسمها “القباحة” والقباحة جايا من لفظة عربية قحّة: قبّح وقُبح وقبيح… والقباحة بالتونسي كلمة متصلة إمّا بقلة الحياء ولا بالفاحشة الجنسية ! معناها الشطحة الّي قال عليها شكيب وتعجّب كيفاش ما شطحتهاش الفنانة نجلاء ضيفة البرنامج فيها شويّة قباحة ! ما تكون كان هكّة…

أما خسارة شكيب ما جاتوش الفكرة باش يورّينا مشطرة منها وحتى علاء ما جاتوش الفكرة… ربّما حشم وقال فكّ عليّ من البنق… قعدنا معلّقين… أما في الحصة الجايا ماذابيك سي علاء ما تنساش باش تقول لشكيب يقرى سورة ويعمل دورة… تمشيشي تسكّر البرنامج سي علاء…؟