الشارع المغاربي : يا خي حتى لين باش توصل النهضة، باش تقنع التوانسة الّي هي ما عادش حركة اخوانية أما حزب مدني، متوسطي، اصلاحي، تونسي، متفتح، ووو…
كانك من المثليين، الّي كانت عليهم لعنة الله ولاّو “ولادنا” حسب كلام الشيخ راشد الغنوشي…
كانك من “نجلاء متاع الحصان” (فنانة تونسية تصورت في فيديو تغسل في حصان وشطرها عريان في لباس ليلي مثير) هاذيكا قال عليها سي حسين الجزيري القيادي في النهضة : “واش خصّ لو كان جاو عندنا منها برشة في النهضة !”…
كانك من اليهود الّي كانو في وقت موش بعيد من أهل الذمة اليوم ولاّو مرحبين بهم في القائمات الرسمية متاع النهضة في الانتخابات البلدية…
على ها المنوال هذا ما يجيكش عجب غدوة يُخرجلنا سي نور الدين البحيري بخطاب يوضّح فيه –هو ماو صنايعي في تحويل الاكحل للابيض – الّي القرآن عمرو ولا حرّم الخمر بصريح العبارة كيف ما حرّم بصريح العبارة أكل الخنزير… ما يجيكش عجب قبل شهيرين من الانتخابات يدوّروها للزبراطة، ويولّيو حتى هما ولادهم….
