الشارع المغاربي – اعداد / بيّة المالحة : ولاّتشي الناس الكل خلاّت همومها ومصالحها وتفركس على معنى “الفرفوري”، بعد ما شبّه به محمد بوغلاب حركة النهضة؟

آش معناها الفرفوري ؟ الناس الكل تسأل وحتى واحد ما طلع الجواب الصحيح ،كل واحد آش يقول ،واحد يقول قماش ولاخر يقول جلد ولاخر يقول ماعون …الحاصيلو قربلّة…

الكلمة هي في الأصل جات في تعبيره تونسية كاملة ،يقلّك “أنظف من الفرفوري بعد غسيلو”.

لكن إلي موش مفهوم هو الغش والتنرفيز متاع يمينة الزغلامي وقت إلّي بوغلاب شبّه حركة النهضة بالفرفوري …توا لو كان بوغلاب شبّه حركة النهضة بالبياض الناصع كانت تتغشش. محقّق ولا ربما راهي زهات وشاخت! مالا علاش ها الغشّ الكل خاصة إلي ما ثماش فرق بين الناصع والفرفوري الاثنين يعبرو على النظافة والألمعية….

زعمة يكونش مخها مشى لحاجة أخرى تغشش وتنرفز .قد يكون والله ةرسوله أعلم…والي في قلب المشوم يبات يحلم به.

صدر بأسبوعية “الشارع المغاربي” في عددها الصادر يوم الثلاثاء 16 أكتوبر 2018.