الشارع المغاربي :
العذاري : احتراماتي سيدي الرئيس.
الغنوشي : تعرفشي علاش استدعيتك؟
العذاري : منّك نسمع سيدي الرئيس.
الغنوشي : على خاطر مانيش فرحان بيك وبالكلام الّ قاعد تقول فيه.
العذاري : بكلّ صراحة ما في باليش عملت ولاّ قلت حاجة ما تعجبكش سيدي الرئيس.
الغنوشي : توّا وقت الّي تصرّح انت وعرفك يوسف الشاهد الّي عملنا نسبة نموّ متاع 2.8 في المائة في الثلاثي الثاني متاع 2018 ما تحشموش على رواحكم؟
العذاري : موش أحنا الّ قلنا سيدي الرئيس أما المعهد الوطني للاحصاء…
الغنوشي : وزيد رقعتك صحيحة من فوق… تي أنا قريتو بنفسي البيان متاع المعهد، وعمرو ولاّ قال 2.8 في المائة أما 0.6 … تكذبو على الناس وعلينا زادة… خلّيتوني في الحشمة… المرّة الأخرى نتحدّث مع موظف سامي من البنك العالمي وبديت نتحدث على نسبة نمو متاع 2.8 ياخي بكلّ حدّة قاطعني وصحّحلي المعلومة قدّام الناس الكلّ وخلانّي مبهذل… تكلّم شبيك ساكت؟ بِكِشْتْ؟!!! وآشنيّة الطلعة الركيكة متاع الكرهبة الشعبية؟
العذاري : ما شاورنيش عليها يوسف سيدي الرئيس… جماعة النداء في وسط بعضهم…
الغنوشي : ايه وانت علاش ما احتجّيتش على ها البهامة وعملت تصريح تتبرّى فيهمنّو ؟
العذاري : ما هو واجب التضامن الحكومي سيدي الرئيس…
الغنوشي : ما ثمّاش تضامن مع البهامة! ما تنساش الّب سيادتك الأمين العام متاع الحركة والّي أنا حطّيتك وسمّيتك موش باش تتضامن مع سي يوسف الشاهد أما باش تعطي صورة مشرّفة للنهضة… يلزمك في أقرب وقت تعمل تصريح تتبرّى فيه من العملة الماسطة متاع السيارة الشعبية… الطبقة الشعبية واحلة في خبزتها وفي قراية ولادها وانتموما تحكيولي على الكراهب… ملاّ قلّة حياء وتصطيكة…
العذاري : حاضر سيدي الرئيس.
الغنوشي : اليوم قبل غدوة.
العذاري : حاضر سيدي الرئيس.
الغنوشي : خيّبت ظنّي يا زياد، راهنت عليك باش تلمّع صورة الحركة بخطاب مسؤول وذكي ووطني ياخي طلعت كي الحنّة في ساق البغل…
العذاري : نوعدك سيدي الرئيس الّي عمري ولاّ نخيّب ظنّك في المستقبل…
الغنوشي : حتى تقعد وزير الساعة… يا ذنوبي…
العذاري : ربي يفضّلك سيدي الرئيس ويحميك ويعلّيك… أنا جندي سيدي الرئيس تحت أمرك وطاعتك… والمناصب عمرها ما تهمّني قد ما يهمّني رضايتك عليّ سيدي الرئيس…
الغنوشي : باهي باهي أيّا برّا اخدم على روحك…
العذاري : حاضر… احتراماتي سيدي الرئيس…
(حوار من وحي الخيال)
صدر باسبوعية الشارع المغاربي في عددها الصادر يوم الثلاثاء 2 أكتوبر 2018.
