الشارع المغاربي : Pinochio، هذايا اسم شخصية خرافية ايطالية مشهورة بالكذب، تكذب كيما تتنفس، حبّينا نعطيوها كنية وقتية الجمعة هاذي لسمير الطيب الوزير متاع دولتنا متاع الفلاحة والماء والصيد البحري ومعاهم حاجة أخرى زادة… كان يكفر بالنهضة ومشروعها وبرئيسها وبمناضليها وبالقبيلة والفصيلة الّي تابعتها وكان حتى الريحة الّي تنجّم تفكّرو في دولة قطر ما يحملهاش… توّا ولّى وخيّان هو والنهضويين والقطريين وحتى عبدة الشيطان كان لزم، المهم يقعد على كرسي الوزير وما يسلّمش فيه…

سي سمير Pinochio ما لقى بها وين كذب كذبة قد راسو : سألتو راديو شمس اف ام على الحوار الّي عطاه سي نور الدين الطبوبي لجريدتنا ولّي تحدث فيه على توقعات ثورة شعبية في تونس. قالك سي سمير Pinochio الّي الحوار هذاي قديم ياسر وظهر للجريدة باش تنشرو توّا… معناها بعبارة أخرى جريدة تحبّ تشعّل النار في البلاد… تي ازّح يا سمير وخيْ هبط للمستوى هذا ؟ يا خي ما عادش تدلّ؟ توّا هذا حدّ عقلك ؟ هكّة ؟ يا خي هبلنا نمشيو نجبدو تصريح قديم ونوظّفو الأمين العام متاع الاتحاد بكلّو ؟ وباش نعملو البوز؟ ياخي تجنّيت ولا شبيك يا سمير وخيْ؟ ربي يلطف بينا وبيك يا وخيْ…

على كل حال تهنّى وارتاح الحديث مع سي نور الدين الطبوبي صار نهار قبل نشرو ومسجل وسي نور الدين شاهد على ذلك اذا كان لزم…

وانت يا سيدي الوزير لو كان سكت راك حجّيت، وبالله ما تتغشّش اذا كان ساعة ساعة نسمّيوك Pinochio… تفدليك وبرّا وربي يفضّلك لتونس…