الشارع المغاربي – اعداد / بية المالحة : مالاّ متوكي هذا فيصل التبيني، نائب عن صوت الفلاحين في البرلمان ! ياخي نورمال في موخّو السيد هذا ؟ شنوّا يقول على سليم الرياحي ويا مندراك وعلى خوه حافظ قائد السبسي واجلّين، فردة ولقات أختها!!! يا أخي ما يجيش منّو ها الكلام هذا بالكلّ ! ها التعبيرة التونسية هاذي ما تنطبقشي على الأشخاص خاصة في قيمة ومستوى سي حافظ وسي سليم القماقم !!! أما على فرادي الصبّاط وزوز شلايك !!! يا أخي سكّتوه سي فيصل، أعملولو حاجة، أربطوه، كتّفوه، حمّلوه باش ما عادش يعاود صنعتو… لا وما كفاهش ها الكلام زاد قال بكلّ صحّة رقعة الّي ما ناقص سي سليم وسي حافظ القماقم كان شفيق جراية ! قالك هكّة يتلمّ الشمل وتولّي الدولة مافيوزية بالفم والملا… ! الحق الحق يلزم الواحد يوقّفو عند حدّو… توّا الراجل في الحبس يعلم به ربي وهو يجبد عليه بكلام كيما هذا ؟ موش معقول جملة !!!

أما ما ظاهرلي كان سليم وحافظ باش يردّو عليه ولاّ يشكيو به… باش يلعبوها محقرانية وزادة على خاطر لو كان يشكيو به توّا يتحاكمو هما موش فيصل… فيصل التبيني… القمقوم…