الشارع المغاربي – إعداد بية المالحة : رئيس حزب الفلاحين فيصل التبيني كان واضح وقاطع وفي الموضوع هذا يعرف أش يقول… سألوه: “تونس عندها فحل اليوم؟” أش كان جوابو: “لا ما عندهاش… الأسامي برشة والكلّها تدعي الفحولة وحتى واحد ماهو قادر باش يلقّح البلاد هاذي حتى في 24 شهر موش في 24 ساعة متاع البقرة”.
لا هاذي ما جبتش فيها يا فيصل… أيا شدّ عندك : “ياخي سليم الرياحي موش فحل؟ وحافظ قائد السبسي موش فحل؟ ويوسف الشاهد موش فحل؟ وراشد الغنوشي موش فحل؟ ورفيق بوشلاكة موش فحل؟ وإياد الدهماني موش فحل؟ وكمال مرجان موش فحل؟”. توّا واحد كي الغنوشي عندو 7 سنين وهوّ يلقّح في تونس وتبارك الله ناوي باش يزيد يواصل… شوف محلاها تونس كيفاش ولاتّ في السبعة سنين هاذم : الخيرات السبعة موجودة والناس فرحانة وحتى واحد ما عاد يسال بلادنا صوردي… أمورنا في الجبن… تقول انت البرباشة الّ عايشين مالزبلة ولاوّ 5 ٪ من الشعب التونسي معناها 600 ألف تونسي وتونسية؟ لا عاد ما ندخّلوش شعبان في قعبان، هاذوكم الفحولة متاع تونس ما يحسبوهومش… موش داخلين في الحساب… أما في العقاب…