الشارع المغاربي – اعداد بية المالحة : ما عادش فيها! أكاهو! وفى الحديث! يزّي! السماح! آش فمّة؟ حاجة من الاثنين… ياما أنا بيّة المالحة صاحبة هذا الركن في “الشارع المغاربي” ضبّعت ولاّ سليم الرياحي ضبّع!!! سمعتوه آش صرّح وآش قال في جريدة “الخليج” الاماراتية نهار الاحد الّي تعدّى؟ شيّ يشبّه للكذب ! تي أنا كذب؟ تي الراجل طلع مقربع ما ثمّاش كلمة أخرى… إم-قر-بع… قالك هو توّا في مهمة! شنيّة سيدي المهمة؟ شدّو عندكم : “مهمة تجميع القوى الوسطية لتشكيل حزب كبير” أَبَيْ!!! تي الراجل ضارب 5 سنين حبس غيابي على شيكات، وعندو توّا أكثر من شهر وهو مخبّي وجهو في الخارج، مرة في باريس ومرة في الامارات
… ولو كان يرجع يلقى دوسي قد الماهي يستنّى فيه من عند الكليبيست فيه ما فيه : تحيل وامضاءات مزيفة وكتابات حسابية غالطة، الحاصيلو دوسي مشخشخ… وزيد على هذا الكل السيد تاهم يوسف الشاهد وجماعتو بمحاولة الانقلاب على الباجي قائد السبسي ولا حضر وقت الّي استدعاه حاكم التحقيق ولا بعث الحجج الّي قال راهم عندو… ويحب سيادتو يجمع القوى الوسطية لتشكيل حزب كبير…
بربّي قولولي من أنا بلاد ومن أنا بقعة باش يقوم بهالمهمة؟ من باريس؟ من لندرة؟ من الامارات؟ من تركمانستان؟ ولا من الحبس الّي باش يدخلو دغري اذا كان التقربيع متاعو رجّعو لتونس؟ وغريبة الغرايب الّي سيادتو مازال الامين العام متاع النداء… ما نحّاوهوش مخلّينو باقي في بلاصتو وقاعد يتحدث السيد كأمين عام للنداء الحزب الّي آمنو بيه تقريب زوز ملاين توانسة… يظهر فيه عْدَا جماعة النداء ولاّو أكثرهم حتى هوما مقربعين… على كل حال اذا كان باش يقرر باش يرجع ما ينجّم يكون كان يوم 30 فيفري كيما قالت انصاف بوغديري في موقع Business news وربي يقدّر الخير ويبعّد علينا البلاء…
