الشارع المغاربي – اعداد بية المالحة :قالك بوبكر بن عكاشة منشّط “ميدي شو الشاهد” على راديو موزاييك موش سعيد بالتحاق سمير الوافي بقناة التاسعة، ماهو زادة بن عكاشة يصول ويجول في قناة التاسعة يخدم في يوسف الشاهد ومشروعو ما عادش بالتُخبية والذكاء أما بالجهار، جهار يا البيّ… ربما ماشي في بالو إلّي التوانسة دُغف ويِنَجّم يعدّيها عليهم بشوية زخرفات وطلامس…
وعلاش سيادتو موش سعيد بالتحاق سمير الوافي ؟ ما قالش علاش أما الفاهم يفهم : ما ينجّم يكون كان على خاطر دخول سمير الوافي للحبس من أجل التحيّل، ما ينجّمش يكون ثمّة سبب آخر، عمرو ما قال بن عكاشة كلام كيف هكّة في سمير قبل ما يدخل سمير الحبس…
في ما يخصّ التحيل الواحد ينجّم يتساءل : أمّا أخطر وأما أبلد وأما أسقط التحيل باش الواحد يدبّر شوية مصروف وإلاّ التحيل على رأي عام كامل (ماناش نقصدو في بن عكاشة طبعا أما في متحيّلين آخرين) خدمة لشخص وإلاّ لحزب على حساب أصول المهنة والحياد والاستقلالية ؟ واذا كان زادة الخدمة فيها شوية مربوح (ماناش نقصدو في بن عكاشة طبعا أما فيمتحيّلين آخرين) يولّي تحيّل على تحيّل وفي التحيّل عندك ما تختار…
