الشارع المغاربي: بالله يا ناس، يا عباد ربي ما زالش الواحد يفهم حاجة في ها البلاد؟… حتى من سي الطاهر بن حسين، رئيس حزب المستقبل، رجل أعمال ناجح – تبارك الله قال الّي ثروتو توصل لـ 20 مليار– وسياسي قديم في النضال ضد الدكتاتورية، حتى هو ولّى يخلوض…

سمعناه في حصة تلفزية يقول الّي حزبو باش يكون حاضر في 100 دائرة بلدية ياخي ما قدّم كان قائمة وطيّحوهالو… وسمعناه يقول الّي هو ندم حتى لين كلا صوابعو كي باع قناة الحوار التونسي لسامي الفهري… معناه ماهوش راضي على السياسة الّي قاعدة القناة اتبّع فيها… ياخي بعد مدة قصيرة، نهار الثلاثاء الّي تعدّي شفناه يتحدث مع مريم بالقاضي في نفس التلفزة الّي قال ندم على بيعانها…

تفهموشي حاجة يا عباد ربي…

لا خير فيه الّي مشى يتكلم في تلفزة يعتبرها –ضمنيا– ما تصلحش، ولا خير في مريم بالقاضي الّي استدعات واحد تلفزتها موش عاجبتو… أما الحقيقة عملت فيه وهنتلتو برشة مرات… الحاصيلو تجي تفهم تدوخ…

أما عمك الطاهر بن حسين كيف ما يقول المثل الشعبي : “كنا نحسايبوه رئيس السُلاَمِية يا خي طلع يشطح وفي يدو بندير“…