الشارع المغاربي: الشيخ راشد الغنوشي وعد التوانسة بويفي wifi بلّوشي اذا كان طبعا انتخبو قائمات النهضة في الانتخابات البلدية، والشيخ (شيخ اسلام موش لعب) مبدئيا ما يكذبش عملا بالآية الكريمة : “يا أيها الذين آمنوا لم تقولون ما لا تفعلون كبر مقتا عند الله أن تقولوا ما لا تفعلون“. وحتى لو كان فنيا وميدانيا صعيب باش يولّي الـ wifi بلّوشي خاصة في الأعماق الريفية كيما الحشاشنة والبشاشمة، الشيخ ينجّم يوجّه دعاء للمولى ودعاء الشيخ مستجاب طبعا…

إمّالا شبيه الاعلامي الصافي سعيد يتهم في الشيخ راشد الغنوشي بالكذب وقال الّي “يقوللكم” نعطيعم ويفي بلاش كذّاب ! توّا يجي منّو هذا يا رسول الله ؟! الشيخ راشد الغنوشي ويا من دراك كذّاب هكّة ؟!

أما بالكشي الصافي سعيد هو الّي يكذب خاصة الّي الأكاذيب متاعو (موثّقة عندنا بالصورة والكتابة) لا تحصى ولا تعدّ؟

وتوّا الشيخ باش يسكتلو ياخي ؟ يتهمو بالكذب ويسكت؟  في نهاية القول الواحد ما عادش يعرف : يا لندرا واحد منهم يكذب ولا الاثنين يكذبو ؟ والله شيء يدوّخ.