الشارع المغاربي: طفطف الهم على قلبها، سكتت وصبرت وصابرت حتى لين طرشقت من جنابها… للّا وفاء مخلوف نوّارة من نوّارات نداء تونس ومن المؤسسات القانونية لنداء تونس ما تتكلمش برشة، قليل وين شفناها في البلاتوهات تتمجدق كيف أغلب الغشاشر…
المرة هاذي ما نجّمتش تقعد ساكتة، في “الميدي شو” متاع “موزاييك” تقرّعت أما بلطف أما تقرّعت وقعرت البندير… الحاصيلو محلاها هاك المرا قدّاش سيّسة وفي نفس الوقت ماضية…
كي تجبد الحديث على حافظ قائد السبسي قالت بلاش تشنج وبكل برودة دم : “حافظ قائد السبسي مدير تنفيذي ان شاء الله مؤقت…” ثمّة ما أبلغ من ها التعبيرة؟ معناها يا سيدك بن سيدك وقتاش يا ربي نرتاحو منّو… رانا فدّينا وما عادش انجمّو !!! هذا اش معناها وكيف ما يقول المثل الشعبي : جبناه على ليلة ياخي نبّت…
ايه وزعمة وفاء مخلوف حالة شاذة ؟ هي الوحيدة الّي تخمّم هكّة في زعيم حزبها والاّ ثمّة برشة كيفها ؟ ان شاء الله على كل حال ها الكلامات والسلامات في وسط الحزب الحاكم متاع البلاد مجرد مناوشات مؤقتة..
