الشارع المغاربي – إعداد بية المالحة : سي محمد الناصر ربّي يبقيه لتونس ما كانش في بالو الّي ثمّة آلة تسجيل محلولة وقت الّي تحدّث مع معاونة من معاونيه وهو يرأس جلسة من جلسات البرلمان متاعنا، البرلمان العزيز الغالي…
آش قال سي محمد للمعاونة متاعو وهي تمدّلو في دوسي؟:”في عوض تعاون فيّ تفدّد فيّ” توّا بالله المرا جات تفدّد فيه؟… هكّة؟ ماهي جابتلو دوسي باش تعاونو في رئاسة الجلسة، باش يبدى مطّلع وما يعملش تهدريزة ولاّ اثنين… فبحيث ظلم… عيني في عينك!
أمّا شنيّة الحكاية ؟ الحكاية الّي سي محمد ربّي يبقيه لتونس، فادد بطبيعتو ومتهيّئ للفدّة، وآش ما جاء يفدّدو… تي الراجل عندو فوق بيروه أكثر من 70 مشروع قانون مازال البرلمان متاعنا، البرلمان العزيز الغالي، ما نظرش فيهم! يا ذنوبي كان يتفصلو منهم في البرلمان هذا! عندو الحق باش يفدّ وزيد الفدّة الّي جاية من الكلام الّي يسمع بيه في وسخ وذنيه خاصة من عند فيصل التبيني… لا محالة هو غرزة ميتة وعزوزة ما يهمّها قرص ويبيع القرد ويضحك على شاريه، أما للفدّة حدود يا أخي! ترصّلوشي زادة محسوب على الطرابلسية الجدد الّي الشعب فدّ منهم كيف ما صاحو وعيّطو المحامين في المظاهرة الّي عملوها الجمعة الّي فاتت أمام المسرح؟ خلاصة القول المعاونة متاعو مسكينة جات في العراضة ويخلف عليها ربّي.
