الشارع المغاربي : ملاّ كلمة قالها سي الحبيب الراشدي، كاتب عام نقابة السجون في خوه اياد الدهماني الناطق الرسمي متاع الحكومة! منين جابها؟ تبارك الله عليه… في أربعة كلمات عبّر على خمسين معنى ومعنى وكل معنى أتعس ماللاّخر…

قالك : “ياخي اياد الدهماني ما عندوش راجل يحكم فيه؟” الله الله الله يا والله أحوال… التعبيرة التونسية الصميمة هاذي نقولوها بصفة عامة على مرا هاجت وماجت حتى تولّي الناس تقول: “يا خي ما عندهاش راجل يحكم فيها؟”

وتوّا كي ينزل سي الراشدي بتعبيرة كيف هاذي على سي اياد الدهماني ويا من دراك، عمرو لا كذب حتى كذبة وما يعرفش الكذب آش خلاّهم سمّاوه الناطق الرسمي متاع الحكومة، آش يقصد زعمة سي الراشدي؟ يقصد الّي سي اياد الدهماني متسيّب، ياخو ويعطي، ويهزّ ويصبط، يلزمو راجل يوقّفو عند حدّو ويرشّدو ولا يقصد الّي سي اياد الدهماني فِقْدْ صفات الرجولة (الأدبية طبعا) على خاطر من الناحية الجسدية تبارك الله عليه الخير طرّاه والاّ يقصد حاجة أخرى أحنا ما فهمناهاش؟ الله أعلم… المفيد كلمة موش مفهومة وجات من سيد معروف عليه الّي هو زادة في بعد ساعات يهزّ ويصبط… وزعمة اياد ولد الربع سليانة أرض الاحرار والكرام امّالي تونس الاصليين باش يسكتلو؟ المشكل الّي كان سكت يا ويح وكان تكلّم يا ويحين… وربي يقدّر الخير.