الشارع المغاربي :في بالكم يا جماعة الّي ثمّة مشاريع قوانين تستنّى توّا ليها 4 سنين باش تتعدّى للبرلمان ؟ البرلمان متاع تونس طبعا!!! 4 سنين يا بوقلب ومازال ما جاش طريقهم !!! وإذا كان جا طريقهم بقدرة ربي زعمة ما زالو يصلحو ها القوانين؟
في هال 4 سنين العالم الكل تبدّل، ما بقى شيء كيف ما كان… لا عملة، ولا تجارة، ولا بلدان، ولا قيم، ولا شيء… في ال 4 سنين هاذم ملّ ولّ سي محمد الناصر ربي يبقيه رئيس البرلمان حتى تونس زادة تبدّلت… ما عاد شيء كيما قبل… الأمور تحسّنت في جميع المجالات… الدولاب داير، والفقر
تنحّى، والجوع ما نعرفوش شنوّا معناه، والدينار طالع للسماء والفسفاط يخدم ليل ونهار وسي الباجي وخوه راشد متفاهمين، وخيّان كيما البارح كيما اليوم كيما غدوة، وسي يوسف الشاهد وخوه نور الدين الطبوبي راسين في شاشية… الحاصيلو الأمور عال العال… بحيث مشاريع القوانين الّي تستنّى ما عادش لازمة… ما عندها ما تحسّن حتى شيء، بعَْدَ الأمور حسنة جدا…
خلاصة القول ربي يخلّيلنا ويحميلنا سي محمد الناصر، عرف كيفاش يرقّد مشاريع القوانين حتى ولو ما عادش يصلحو… هاي المعلّميّة ولاّ بلاش !!! شوفو محلاه سي محمد وقت الّي يبدى متصدّر على كرسي الرئاسة… تشوفو عليه علامات الحيرة ولاّ التشاؤم ؟ لا أبدا ! أمورو هانية ومتهنّي ومادد سويقاتو…
بعد الّي تونس أمورها في الجبن ! علاش الغصرة؟ الى أن تزلزل الأرض زلزالها وتخرج أثقالها… الحديث عن تونس طبعا ورئيس برلمانها :
