الشارع المغاربي – اعداد بية المالحة: سي عبد الحميد الجلاصي، واحد من القياديين النهضويين التاريخيين الّي حبّو يحطّو الغنوشي في أقلية في المؤتمر الّي فات متاع حركة النهضة ويقسمو معاه قيادة الحركة، خرج ها الأيامات من قشرتو اللّيّنة والعاقلة… ولاّ يتحدث على العفارت والشواطن الله معافينا… أكاهو ماعادش بيها وين، النهضة تِكْبِسْ عليها الخناق ورجعنا لثقافة العشائر وانصر أخاك ظالما أو مظلوما… قالك سي عبد الحميد الله يذكرو بالخير : “ما تقولوش النهضويين يعطيو انطباع impression الّي هوما عقلاء (معناها بالتونسي ولاد ناناتي) أما عفرّت ويعرفو الشيطان وين خبّا ولادو”… يا لطيف.

معناها ما يفوتهم شيء ويعرفو كل شيء خاصة الجماعة الّي تستنّى فيهم في الدورة كي الشواطن على أساس أنهم هوما النهضويين ملايكة! واجلّين… وباش يقول الّي هوما مزوّرين وفايقين وأولاد مؤقتة شبّهم بالعفارت ! علاش لا ما ثمّاش مانع كلّ واحد يشبّه روحو بالّي يحبّ… تبقّينا ثمّة لغة اللاشعور الّي في أغلب الأوقات تكشف حقيقة المتحدث…
يا خويا وقت الّي واحد يركّز كلامو على الشواطن والعفارت ينجّم يكون مخّو معبّي بيهم… الله لا يقدّر… وتوّا شكون الشيطان الّي يعرفوه النهضويين ووين مخبّي ولادو؟ سي الباجي ؟ حاشاه موش شيطان ! يوسف الشاهد؟ هاذاك ما جاء شيء ! اليسار والجبهة الشعبية ؟ والله الحقّ الحقّ حتى واحد من الزعماء ما عندو خليقة متاع شيطان! مالاّ شكون؟ يا أخي ما ينجّم يكون كان واحد منهم، على خاطر ما يعرف الشيطان كان الشيطان…