الشارع المغاربي: ملاّ كلام قالو لزهر العكرمي ها الايامات في حافظ قايد السبسي، كلمة قدّ الجبل متاع اهانة وتمزبيل وتطييح قدر. هيا شدّ عندك : “ولدك يا سي الباجي ما نجحش والّي دايرين بيه باش يحطّوه بجانب عماد الطرابلسي في الحبس (قناة التاسعة)، وولدك بِرك على النداء كي بوتلّيس وباش يقضي عليه (شمس اف ام)، حافظ مكانو الطبيعي في الحبس والمصادرة (تدوينة)”.
الّي يبهّت أكثر من كلام العكرمي هو سكوت حافظ وسكوت الاستاذ الباجي بوه… لازم حبّو يقولو الّي ها الكلام الساقط ما يستهالش حتى مجرد الردّ ولسان حالهما يقول : “اذا جاءتك مذمتي من ناقص فهي الشهادة بأنني الكامل“.
صحيح ينجّم يتفهم هكة السكات متاعهم لكن يا أخي الكلام فيه “حبس وبوتلّيس ومصادرة“… ملاّ لعب… وينجّم السكوت زادة يتفهم بطريقة عكسية : خوف من المواجهة وخوف من التقاضي أمام المحاكم وتولّي ربما محاكمة حافظ…
ملّخر ياسر طاح القدر وياسر طاح مستوى النشاط السياسي في تونس، لا خير في هذا ولا في ذاك والخاسر هي تونس ووعد ربي عليها… شكون ينجّم يقول للباي سروالك محلول…
