الشارع المغاربي: رد فاضل عبد الكافي رئيس حزب افاق تونس بطريقته الخاصة على ما ورد من تلميحات لشخصه في تصريحات رئيس الجمهورية قيس سعيد خلال استقباله يوم امس كل من يوسف بوزاخر رئيس المجلس الأعلى للقضاء ومليكة المزاري رئيسة مجلس القضاء العدلي وعبد السلام مهدي قريصيعة الرئيس الأوّل للمحكمة الإدارية و محمد نجيب القطاري رئيس مجلس القضاء المالي عندما قال ان “الاعلام يصور احد اللصوص على انه منقذ” مشيرا الى ان القضاء كان قد برأه .

واكد عبد الكافي في تدوينة نشرها مساء يوم امس الاثنين 6 ديسمبر 2021 على صفحته بموقع فايسبوك انه اصيب بخيبة امل بعد 25 جويلية لان العالم السياسيوي التونسي ازداد سوءا وتدهورا على جميع الاصعدة مشيرا الى ان جل ما سمع عن هذا العالم منذ دخوله اليه كان صحيحا من تخوين وسب وشتائم واتهامات بالباطل مشددا على انه اتخذ عهدا على نفسه انه مهما كانت الاتهامات التي ستطاله لن يسقط في ما اسماه بمستنقعات العالم السياسيوي.

وكتب عبد الكافي في تدوينة” أشهر مضت كُنت حكيت عن عالم السياسة “التونسي” …عن طريقة العمل متاعو وعلى المُعْجِم و والمُصْطَلحات اللّي يستعملوهم فيه.للأسف، منذ سنة من تاريخ دخولي ليه، جُلّ اللّي سمعتو على العالم السياسوي هذا كان صحيح: تخوين وسبّ و شتائم واتهامات بالباطل وراهو صاحب صنعتك عدوّك وراهي مش مصلحة البلاد هي الأولى وراو حد ما يعمل تقييم لروحو فاش غلط بل بالعكس كل واحد يرمي اللّوم على الآخر وراهو جزء من السياسيين آخر همّهم حال التوانسة وعيشتهم كل يوم.”

واضاف “للأسف زادة بعد 25 جويلية ويُمكِن خاطر كبرت و”تربّيت” نسبّق حُسن النيّة قبل سوءها آمنت اللّي تونس باش تتبدل نحو الأفضل والخطاب السياسي والعالم السياسوي التونسي باش يولّي عالم سياسة حقيقي كيف ما نشوفوه في البلدان المتقدمة ولكن للأسف زادة خيبة أمل أنو العالم هذا ازداد سوءا و تدهوّرا على جميع الأصعدة….للأسف نقولها على خاطر عالم السياسة التونسي اللّي نحلم بيه بغض النظر على أنك معايا و الا ضدّي توافقني او تخالفني الرأي الاحترام والأخلاق هوما اللّي يحدّو نوع العلاقة بيني و بينك. العالم السياسي اللّي نتمنّاه لتونس هو عالم وين الحجّة بالحجّة والرقم بالرقم والبرنامج بالبرنامج والبرهان بالبرهان، و نتحاور معاك وتتحاور معايا خاطر الحوار أول قواعد الديمقراطية. …العالم هذا الهدف متاعو نقدّمو حلول، نعطيو المَثل والنموذج للتوانسة: في الألفاظ اللّي نستعملوها، في الهدوء وردّة الفعل كي نتكلّمو على خاطرنا نمثّلو دولة وشعب، مش في أنفسنا فقط، في الاستماع للطرف المقابل خاطر حتّى حد ما عندو الحقيقة المطلقة و الحلول لتونس هي حُلول تساهم فيها التوانسة الكل خاطرها بلاد الناس الكل.. في احترامنا زادة للّي يتخالفو معانا في الرأي، بمُقارعتهم بالحُجج والأفكار والتصوّرات وليس بتخوينهم و قذفهم بالباطل واتهامهم زُورًا وبُهتانا وتضليلا.أنا خذيت العهد على نفسي أيا كانت الظروف و الاتهامات التي ستطالني، عمري لاني باش نطيح في مستنقعات العالم السياسوي هذا بل بالعكس باش ندافع على عالم السياسة اللّي نحلم بيه، على خاطرني دخلت السياسة مش لمصلحة شخصية أو انتقام أو تشفّي من الآخرين، أما باش نساهم، مع توانسة أخرين، مهما كانت اختلافاتي معاهم أنو نبنيو دولة للتوانسة الكل، أيا كانت جهتهم وإلا “نَسَبُهم”، دون تفريق أو تقسيم، باش نخرّجوها من المأزق اللّي فيه ونحلّو فيها آفاق جديدة لأولادها و بناتها.”

وتابع “هذا قوس “فايسبوكي” حبيت نفتحو ونغلقو فيسع، خاطر التوانسة اللّي نشوفو فيهم كل يوم في كل جهات الجمهورية، عطاونا أمانة، وخاطر كي نقولولهم الحقيقة مش تخويف إنما أحنا صادقين ونقولو الحقيقة كما هيّا وعلى خاطر تونس تستنّى منّا برشا خدمة وحلول وأفعال وأقل أقوال وكلام وضوضاء ماهيش باش تزيد التوانسة حتّى شيء، بل بالعكس تضيّعلهم وقتهم و مستقبلهم. تونس عندها رجال ونساء مش مسلّمين فيها و باش يرجّعولها قيمتها وباش يحرّرو طاقات شعبها.”

يذكر ان رئيس الجمهورية قيس سعيد كان قد تحدث يوم امس عن شخص قال انه “كان مطلوبا للعدالة وفي نفس الوقت تدخل من تدخل لابرام صلح وانتم تعرفون من تدخل ..وهو لص واليوم يتحدثون عنه وكأنه منقذ …وكان انقذ نفسه من القضاء ووصلت الى محكمة التعقيب في وقت من الاوقات وللاسف حصل على حكم بالبراءة”.